لكل الزوجات

اوعوا تفكروا انى هقولكم

اغلبيه بالعيال يغلبك بالمال

ولا

قصقصى ريش طيرك قبل ما يلوف على غيرك

ولا

يامأمنه للرجال يامأمنه للميه فى الغربال

الكلام ده بطل
——–

مش قصدى غلط

بس دلوقتى ياحبيبتى

عصر الانفتاح

فى كل شى

يعنى الراجل

لاعيل يربطه ولا قلة مال تقيده
——————–

طيب والحل؟

بصى ياحلوه منك ليها

املى عينك جوزك
———

مش بس باللبس والتغيير

لا كمان باهتمامك ببيتك وعيالك

وهو كمان اهتمى بيه واصبرى عليه

زى ما بتصبرى على النونو بتعاك

كل المواضيع بتركز

احنا ازاى نلبس ونعمل شعرنا

طيب انا معاكى

خلى انك لبستى واتظبطتى

وجوزك رجع لقى هيفاء عنده فى البيت

اكيد هيفرح ويطير من على الارض

بس هينزل تانى الارض لو دخل المطبخ

ولقاها مش نضييف

ومش معنى كده

انه يرجع يلاقى

البيت فله ولا قصر الملوك

ويبص لمراته يلاقى الشاويش عطيه

لا وفقى بين ده وده

وكمان هقولك

على سر تانى
———-

البنات دلوقتى مش لاقيه جواز

وبتدور على اى راجل وترمى شباكها عليه

مش بيهمها متجوز مطلق اعزب

المهم انه راااااااااااجل

هو بقى ياقمر لو مستريح فى بيته

عمره ما يبص بره

ولا توقعه نظره ولا كلمه ولا همسه

لكن لو لاقدر الله

مراته مش مهتمه بيه

هو هيقع من غير لاكلمه ولا همسه ولا نظره
يبقى ايه بقى

ناخد بالنا

وافتكرى يااختى انتى وهى

انك قاعده مكشره وعاملاله ال111

وافتكرى انك بتستقبليه( بابنك عمل& وامك قالت)
وعنده فى الشغل اللى بيستقبلوه بالسلامات والطيبات

ده غير ان الشوارع عندنا مليانه

وما ادراك ما الشوارع فى مصر

والله الواحد بيتكسف من اللى بيشوفه

البنات والستات عاملين ايه فى نفسهم

من لبس وميكب وابتسامه ايه

من الودن للودن

ولا الصوت مفيش انعم من كده

خدى بالك ياقمر انتى وهى

الراجل زى العيل الصغير

يحب الحنيه

ويهرب من القسوه

خليكى امه لما يحتاج الحنان

خليكى صحبه لما يحتاج المشوره

خليكى بنته لما تحتاجى رايه

قومى بكل الادوار ديه

واحمى جوزك وغضى بصره

واضمنى الجنه باطاعتلك ليه

وكفايه بقى كده

خلاص ما تزقوش

هنزل من على ودانكم اهو

انا عارفه انى اتكلمت كتير

بس والله خوفا على مصلحتكم

لانى فعلا بحبكم فى الله

ربنا يسعد قلوبنا جميعا

ويريح بالنا

ويجعلنا قرة عين لازواجنا

اللهم امين

0 التعليقات:

المتابعون